കുറച്ചു ദിവസങ്ങളായി നല്ല ജോലി തിരക്കിലായിരുന്നു.പുതുതായി ജോയിന്‍ ചെയ്ത കമ്പനി ആയ കാരണം വര്‍ക്ക് ലോഡ് കൂടുതലാണ്.നല്ലൊരു സ്വപ്നം പോലും കാണാന്‍ സാധിക്കാതായിരിക്കുന്നു.കണ്ണടച്ചാല്‍  " ഇനിയും തീര്‍ന്നില്ലേ..." എന്ന ഒരൊറ്റ ചോദ്യവുമായി മുന്നില്‍ നില്‍കുന്ന ബോസ്സിന്റെ രൂപം മാത്രം.

" ഞാനിത് തിന്നു തീര്‍ക്കുകയല്ല,,," എന്ന് പറയാനായി തുനിഞ്ഞപ്പോളാണ് സുരേഷ് ഗോപിയുടെ വചനം ഓര്മ വന്നത് .  " ഒരൊറ്റ ചോദ്യം മതി....ജീവിതം മാറി മറിയാന്‍ "അത് കൊണ്ട് മാത്രം ഞാന്‍ മനസ്സില്‍ തികട്ടി വന്നത് അവിടെ തന്നെ ഒതുക്കി.
അല്ലേലും എനിക്കിങ്ങിനെ പണിയെടുക്കേണ്ട കാര്യമൊന്നുമില്ല.പിന്നെ....കുടുംബം........

അങ്ങിനെ കാത്തു കാത്തിരുന്ന വ്യാഴം വന്നെത്തി.പതിവ് പോലെ ഹാഫ് ഡേ ലീവ് ആഘോഷിച്ചു കൊണ്ട് സ്വന്തം ബ്ലോഗിന് മുന്നില്‍ തലേന്നത്തെ പോസ്റ്റിന്റെ കമന്റ്‌ നോക്കിയിരിക്കുമ്പോലാണ്  അബിയുടെ  ( പ്രിയതമ )പിന്നില്‍ നിന്നുള്ള വിളി

   " ഉം...നല്ലൊരു വ്യാഴമായിട്ട്..ആ കുന്തത്തിന്റെ മുന്നിലിരിക്കാതെ ഐശൂനെ ഒന്ന് നോക്കിക്കേ...ഞാന്‍ ഇന്ന് ഡിന്നറിനു " ദാല്‍ ബാട്ടി " ഉണ്ടാക്കാന്‍ പോവുകയാ..

  " ദൈവമേ...അപ്പൊ ഇന്നും ഭക്ഷണം പുറത്ത് നിന്ന് തന്നെ കഴിക്കേണ്ടി വരും " ഞാന്‍ കാലിയായ പഴ്സിലേക്ക് നോക്കി നെടുവീര്‍പ്പിട്ടു.
    കളിയാകൊന്നും വേണ്ട..ഞാന്‍ ഇതിനു മുന്‍പ്‌ പരീക്ഷിച്ചു വിജയിച്ചതാ...അബിയുടെ വക ഗ്യാരണ്ടി.

 പട്ടിണി കിടക്കെണ്ടല്ലോ എന്ന് കരുതി എന്ത് ഉണ്ടാക്കിയാലും " ബാലെ..ഭേഷ്...സൂപ്പര്‍ " എന്നൊക്കെ ഞാന്‍ പുകഴ്ത്ത്തുന്നതിന്റെ അഹങ്കാരം.അല്ലാതെന്തു പറയാന്‍.

 " ദാല്‍ ബാട്ടിയുണ്ടാക്കി ഞാന്‍ ഒറ്റക് തന്നെ കഴിക്കും.ആ നേരത്തെ കുറച്ച തായോ എന്നും ചോദിച്ചു വാ...അപ്പൊ ഞാന്‍ തരാം ട്ടാ....ബിസ്ക്കറ്റ്.....പട്ടിക്ക് കൊടുക്കണ ബിസ്ക്കറ്റ് "

ഡയലോഗ് അടിച്ചു ഐശൂനെ എന്റെ മടിയില്‍ വെച്ച്  അബി അടുക്കളയിലേക് പോയി.

കറക്റ്റ് സമയം നോക്കി അവള്‍ പണിയൊപ്പിച്ചു." സാധനം നുമ്മ ഡെലിവറി ചെയ്തൂട്ടാ..." എന്ന അര്‍ത്ഥത്തില്‍ ഐശു എന്നെ നോക്കി ഒന്നര പല്ല് കാണിച്ചു ഒരു നോട്ടിഫികേഷന്‍ തന്നു.

അത് വരെ എന്റെ മുഖത്തുണ്ടായ മള്‍ട്ടിപ്പിള്‍ വികാരങ്ങള്‍ സിംഗിള്‍ വികാരത്തിനു വഴി മാറി.വേഗം തന്നെ ഐശൂനെ താഴെ വെച്ച് ഞാന്‍ പതുക്കെ സ്കൂട്ടായി.

 " വപ്പാനേം മോളേം നോക്കി ഞാന്‍ വയ്യാതായി.എല്ലാത്തിനും എന്റെ കയ്യും കണ്ണും എത്തണം...എന്നെ ഒന്ന് സഹായിച്ചാല്‍ എന്താ...?  സോഫ്റ്റ്‌ വെയറും ഹാര്ഡ് വെയറും ഒക്കെ യായി നടന്ന് ..ഇയാള്‍ടെ ഹാര്‍ട്ടും ഹാര്ഡ് ആയി മാറിയിരിക്കുന്നു. "

പരാതിക്കിടയിലും ഭാര്യയുടെ വക കൌണ്ടര്‍.

കൃത്യം ഒരു മണിക്കൂര്‍ കഴിഞ്ഞപ്പോള്‍  " ഇക്കാ...." എന്നുള്ള വിളി അടുക്കളയില്‍ നിന്നും കേട്ടു.
ഭര്‍ത്താവിനെ ഇക്കാ എന്ന് വിളിക്കുന്നത് സാധാരണം. എന്നാല്‍ വിളിക്കുന്നത് അഭിയും..വിളിക്കപ്പെടുന്നത് ഞാനും ആവുമ്പോള്‍....അതിലൊരു അപകട സൂച്ചനയില്ലേ..?

പിന്തിരിഞ്ഞു നോക്കിയപ്പോള്‍ ഒരു പുഞ്ചിരിയോടെ അബി.
" മുബാറക് സെന്റെറില്‍ പുതിയ പിസ്സാ ഹട്ട് ഓപ്പണ്‍ ആയിട്ടുണ്ട്‌.ഇന്ന് നമുക്ക് ഭക്ഷണം അവിടന്നാക്കിയാലോ ? വിളിച്ചു പറഞ്ഞാല്‍ അവര്‍ അര മണിക്കൂറിനുള്ളില്‍ എത്തിക്കും.

ദാല്‍ ബാട്ടി കുളമായി..ഇളിഞ്ഞ ചിരിയോടെയുള്ള ആ നില്‍പ്പ് കണ്ടു ചിരിക്കാതിരിക്കുവാന്‍ കഴിഞ്ഞില്ല.